絕症

有無諗過，如果自己有一日證實身患絕症。要背負著絕症生活，一方面唔可以令屋企人擔心，另一方而唔可以俾其他人知道。為求延長壽命而要長期服藥，但同時又睇住自己餘下壽命一日比一日少，最後會因為併發症而慢慢死亡。


如果呢個係你，你會點做？

你會有留低生存嘅勇氣嗎？

會否有自殺嘅念頭？


有時我都會「居安思危」﹣如果有一日我真係有絕症？
我諗我無勇氣去面對。



我有一個朋友，都識左好多年。雖然唔算得上密友，一年都未必見到一次，但係關係唔錯，間中都會閒聊。到近年我先開始深入認識呢一個朋友，包括佢嘅家庭同佢行緊嘅路。

我會覺得佢行嘅路其實好難行。

自小父母離異，學校成續一般，做錯升學決定令佢浪費兩年時間，加上好多其他因素...




前晚佢打俾我，講到中段佢話俾我知佢得到一個絕症。



其實由我第一日開始知道佢有口腔癌，我巳經有預計過最差情況。佢當晚同我講其實巳經唔算得甚麼「大新聞」，或者因為我早就做好心理準備。

佢好奇怪點解我會咁平靜，又唔會怕佢﹣其實無野好怕，而我作為佢朋友，就預左要同佢一齊過埋最後呢一段路。

電話嘅對話入面佢有另一樣野想講，但最後都係無講到。其實我心裡面一早就估到佢想講咩，我亦大概估到絕症嘅來源。



我唔知佢仲可以同我做幾多年朋友，希望可以係永遠，因為我睇到佢好需要有上帝嘅帶領去過餘下嘅時間。

而我亦似乎係上帝為佢安排嘅一個路人，因為我應該係極少數會明白佢情況嘅基督徒。