重遇

好耐無見過一個朋友，佢係我初中時期一個要好嘅朋友，後來因為自己幼稚，大家都唔成熟，加上高中分開左唔同班，我地就愈黎愈陌生。

聽聞佢話過要同我絕交，其實我都只係聽聞...不過就當時佢嘅行為，又似乎係喎。

會考過後，我去左HKU SPACE，而佢就去左學校附近另一間中學讀預科。中間呢段時間都有一大班同學約出黎食下飯，而且仲係我做organizer。

做得organizer即係要打電話約人。望住address book一疊record，就算係女生定係平時好少同佢講野嘅人我都唔怕打出去，唯獨係呢一個舊朋友。

我仲記得，我打電話之前有諗過叫另一個人幫我打俾佢，又諗過不如send短訊...

最後都係要自己打。


要打電話俾一個要同自己「絕交」、「翻了臉」嘅「舊朋友」唔係易事，特別係當你好在意人地點睇自己，又或者怕因為係我打去而令佢唔想同其他人一齊食飯，好可惜喎。

不過出奇地順利，雖然係所有電話之中通話時間最短嘅一個。


飯聚一直我都唔敢亂出聲，最好就咩事都無...

情況卻出人意表，呢位舊朋友正正坐起我對面﹣﹣張枱係由好多張兩人枱合併。

飯後同另一個朋友一舊行返屋企，我地有討論剛剛嘅飯聚。
佢睇得出情況上有轉變，至少大家有計傾，有野講，而且係佢主動問。


果一次食飯係2006年11月，隔左一段好長嘅時間都再無見過呢個舊朋友。
MSN上亦未曾見過佢有Online。
我諗，所有野都可能無變過？

經過一段長時間，各有各忙。
我要為自己一份份Assignment同團契嘅事奉去忙，而佢亦都要積極預備高考。
偶然會起佢嘅日記見到一兩句訴苦又或者自我激勵，到果時我先會諗起呢個舊朋友。
或許我會留言一句「Blessing, Pray for you」，不過...算了，預左唔會有回覆﹣佢比我仲要忙，點會得閒回覆呢？


十二點十分，我起荃灣地鐵站門口經過。今日比平時早左出門口，因為我同呀媽又有言語上衝突，既然係咁，我早D出門口，唔起屋企食飯。

我如常行上地鐵站。

迎面有一個好熟悉嘅人樣。

我唔肯定佢係邊個？

佢見到我，給我一個「Hi there」signal

對，係我嘅舊朋友，好耐無見。
原來佢剛剛考完Math. and Stat.，去緊搵另一個舊朋友食飯。
依舊，大家都好似見到熟朋友一樣搭住膊頭，笑著說「喂，好耐無見喇」

短短幾分鐘，交換左目的地資料（來不及交換近況），巳經令我好開心。
最重要係，大家可以有野講。

「遲D見」


佢繼續向愉景新城方向行，我繼續向荃灣地鐵站方向行。

願上帝祝福我呢個舊朋友。

起地鐵車廂入面，我諗返起2004年夏天，大家都曾經幼稚過。
四年後，我們都成長了。



好耐無見喇，院長。今日你搵Calvin食飯，遲D考哂試約埋Jason佢地食飯？